EKONOMIA MÉDIA IHA RADIU MAUBERE

KAPÍTULU I

1.1 Introdusaun

Timor Leste nasaun demokrátiku presiza iha media ida para atu halo publikasaun kona-ba informasaun entre rai laran no mós rai li’ur.

papel  média iha siklu tolu, knaar média iha epoka kolonial nian luta hasoru estadu portugés no haklaken povu maubere nia lian , iha tempu invazaun luta ba libertasaun liu husi média mak bele informa situasaun Timor nian ba mundu internasional hodi koñese  no iha tempu independensia média iha papel importante ba dezenvolvimentu nasional.  

Nune’e relasiona ho topiku ne’ebé mak  temi iha leten katak,papél média iha Timor Leste  importante tebes ba dezenvolvimentu,tanba média mak sai hanesan matadalan ba sosiedade sira,  hodi bele hatene informasaun ruma ,liu husi meius komunikasaun sosiál ,Wainhira nasaun ida atu la’o ba oin ho di’ak,presija tebes ho media nia prejensa no kontribuisaun ba iha prosesu de konstrusaun estadu ida nian.Hanesan ita hatene katak,komunikasaun sosiál nu’udar prosesu komunikadu ida ne’ebé mak ema uza hodi espresa no hato’o sira nia preokupasaun ba malu,nune’e mós hanesan prosesu ba rekolla informasaun nian atu transmite  informasaun ba iha públiku no  audiénsia sira.

Aleinde ne’e média mak hanesan kanál ida ne’ebé atu transmite informasaun ba públiku liu husi dadus ka informasaun ne’ebé mak jornalista rekolla bazeia ba akontesimentu ne’ebé  akontese iha terrenu. Relasiona ho tema ida ne’e mak  ami grupu  VII nia peskiza iha radiu Maubere, atu hatene kona-ba sira ezistensia no sira  nia ekonomia.

Radiu Maubere ninia ezistensia hamutuk ho partidu Fretilin desde tinan 1974 to’o mai oin loron.

Iha tempu ne’ebá mak Timor Leste hetan Independensia liu husi partidu Fretilin hakarak atu partilla informasaun ba públiku maibé seidauk iha média ida ne’ebé atu bele hato’o sira nia opiniaun ba públiku.

Tanba ne’e mak bainhira Partidu Fretilin nuudar movimentu ida atu hamoris independensia mak nia uza meius oi-oin  atu halo publikasaun informasaun kona-ba situasaun rai laran nian. Ho ida ne’e mak fretilin konsidera papél média nian importante hodi haklaken informasaun direta no indireta ba publiku kona-ba hanoin no programa polítiku ba rai no povu ida ne’e.

Relasiona ho ida ne’ mak Fretilin hahuu dezenvolve no hamoris Rádiu ne’ebé mak oferese husi  ema estranjeiru ida ne’ebé mai iha Timor Leste, tanba ne’e mak iha  tempu rezisténsia hanesan tempu ne’ebé mak difisil tebes ita iha hela esforsu nia laran hodi luta ba ita nia independénsia. Maske iha situasaun difisil nia laran populasaun Timor Leste sei buka meius nafatin atu bele distribui informasaun ba malu liu hosi média massa.

Iha situasaun difisil ne’e mak Rádiu Maubere moris, hodi hala’o nia serbisu transmisaun iha klandestina nia laran. Bainhira ita iha okupasaun Indonezia, Fretilin sira uza Rádiu ne’e hodi hala’o komunikasaun ba malu, no Rádiu ne’e eziste primeiru la ho naran, foufoun ne’e hanesan espesie de kanal hodi hala’o komunikasaun de’it. Kuandu Indonezia komesa domina sidade laran, Fretilin sira hodi Rádiu ne’e desloka ba foho, iha ona foho mak sira foin fo naran ba Rádiu ne’e, ho naran Rádiu Maubere.

Objektivu hosi hakerek traballu ne’e mak hanesan atu haluan liu tan ita nia koñesimentu kona-bá funsaun media lingua jornalista nian , hodi fasilita estudantes universitáriu hotu, liu-liu estudante departamentu Komunikasaun Sosiál, atu nune’e bele hakle’an sira nia matenek kona-bá funsaun media lingua jornalista, no mós bele sai hanesan meiu referénsia ida hodi fasilita ami  nia peskiza.

1.2 Formulasaun problema

A. Oinsa ezistensia Rádiu Maubere iha Timor Leste?

B. Oinsa finanseiru ekonomika ba planu estratejiku iha Rádiu Maubere?

C. Oinsa kualidade informasaun iha Rádiu Maubere?

1.3 Objetivu

 Objetivu atu halo traballu ida ne’e oinsa mak atu kapasita hakerek na’in ninia kapasidade hodi hatene kle’an kona-ba tema husi traballu ida ne’e.

Aleinde ne’e liu husi traballu ida ne’e ami grupu hakarak hatene atu halo peskiza kona-ba;

Ø  Atu hatene kle’an kona-ba ezistensia Rádiu Maibere iha Timor Leste.

Ø  Atu hatene kle’an kona-ba funsionariu Rádiu Maubere nian hamutuk na’in hira.

1.3 Benefisiu

Tema husi traballu ida ne’e ninia benefisiariu mai ami grupu ida ne’e mak atu eleva ami nia koñesmentu hodi buka tan referensia barak atu nune’e bele haten kle’an liu tan kona-ba tema ida ne’e.

Aleinde ne’e mós liu husi traballu ida ne’e mak sai bukaen ida mai grupu atu bele halo diskusaun kona-ba lala’ok Rádiu Maubere nian iha Timor Leste. Nune’e sai matadalan ida mai atu ami prepara-aan hodi ba to’o iha momentu ne’ebé mak ami hakerek ami nia monografia.

KAPÍTULU II

DEZENVOLVIMENTU TEÓRIA

2.1 Teória  Média

Média hanesan instrumentu importante ida  atu hatutan komunikasaun entre komunikadór no komunikante iha prosesu fahe no simu informasaun. Lia fuan média mai husi dalen Latín forma plural husi “medium” ho sentidu katak manu-talin(intermediáriu).

Tuir matenek na’in Purnamawati no Eldarni (2004:4) hateten katak média mak buat ne’ebé uza atu hato’o ka transmite mensajen husi emisór ba reseptór ho estimula,hanoin,sentimentu no atensaun. Nune’e média estabelese intemediáriu ne’ebé kria atu habelar informasaun ho objetivu ba audiénsia sira bele fasilita ho lalais hodi hatene informasaun ruma ne’ebé atuál relasiona ho asuntu ka akontesimentu sira iha sosiedade nia leet iha tempu  determinadu.

Iha parte  seluk tuir McLuhan no  Quentin Fiore hateten katak média sempre iha mudansa sai esensiál iha sosiedade.ho ideia ne’e sira hato’o kona-ba média ne’ebé iha faze istória média nian,kada parte iha relasaun komunikasaun ne’ebé dominante iha determinadu tempu, sai hanesan prosesu ba implementasaun ba karakter valor informasaun iha nedia nian rasik.

2.2 Teória  Ekonomia

Ekonomia hanesan siénsia sosiál ida ne’ebé presiza metodu ida hodi halo analiza ba siénsia seluk mak hanesan Biolojia,Fizika,matematika,no estatistika hodi formula no simplifika atu interpreta ba previzaun ekonomika hotu.

Tuir Gastaldi (2005) pensamentu ekonomiku hodi halo revolusaun tuir periodu husi istória ema nian. Desde iha faze ida ne’ebé  povu moris agrikultura primitiva liu husi mudansa ba povu ne’ebé mak moris husi kasa oinsa atu analiza ba sasan hirak ne’ebé mak povu primitivu sira uza sai hanesan instrumentu ida hodi hala’o sira nia moris hanesan kasa.

Bainhira krize iha tinan 1929 liu husi publikasaun teoria jerál Keynes ekonomista neoklasika sira rekoñese sira nia objetu jerál iha sira nia ekonomia. Tanba sira fahe objetu ne’e fahe ba segmentu rua :

·         Mikroekonomiku

·         Makkroekonomika.

2.3 Teória  Rádiu.

Rádiu hanesan kanál ida ne’ebé mak atu transmite informasaun ba públiku.tanba ne’e mak Rádiu ne’e moris  atu halo interasaun  entre ema ho ema .

Tanba ne’ mak iha tinan1926  iha arbieter Radiu Klub,segundu atu informa ba polisia kona-ba asosiasaun ninia ema hamutuk 1.500 (Dahal 1989;29)

2.4. Ezistensia Radiu Maubere

            Fretilin bainhira moris nu’udar movimentu ba independénsia no nia uza meius no métodu oi-oin atu hato’o informasaun, tanba ne’e maka Fretilin konsidera papél média importante hodi haklaken informasaun direta no indireta ba Públiku  kona-ba hanoin no programa polítiku ba rai no povu ida ne’e.

Ho hanoin hirak ne’e maka Fretilin komesa dezenvolve no hamoris Rádiu ne’ebé maka oferese hosi ema traballador Australianu ida ho naran Bryan Money. Bryan Money mai iha Timor Leste ho objektivu atu halo kontaktu hodi lori Rádiu ida mai intrega ba Fretilin.

Iha tinan 1974, bainhira Insurreisaun Armada Generalizada ne’ebé deklara iha Aisirimou Aileu, kamarada Mari Alkatiri nu’udar komisariu polítiku nasionál, foti inisiativa harii kedas Rádiu Maubere iha kuartel geral Taibesi, no liu tia semana ida muda ba Torre Airoportu Dili, Bairo Pite. Nune’e mós harii Jornal Povu  Maubere.

Bainhira invazaun Indonezia ba RDTL, Rádiu Maubere mós hetan obstákulu boot nune’e hosi loron 7 fulan Dezembru 1975, Rádiu Maubere lakon hosi publiku Timor Leste. Liu tiha tinan ida resin, bainhira Fretilin reorganiza divizaun polítika edal ative no edal iha territóriu laran tomak atu halo rezisténsia nasionál.

Generalizada hasoru okupasaun edal  iha ita nia rain, ho situasaun ne’ebé difisil tebes, lidernsa Fretilin fo atensaun nafatin ba média nune’e foti desizaun importante tebes hodi estabelese hikas Rádiu Maubere, iha responsabilidade depertamentu informasaun no seguransa nasionál (DISN) iha Fehuk Rin 1976 ba iha edal sentru sul ikus mai muda ba edal sentru norte iha 1977.

Responsavél departamentu nian mak kamarada Alarico Jorge Fernandes, nu’udar Ministru de Informasaun I Seguransa too rohan iha tinan 1978.

Iha tempu ne’ebá difisil tebes atu hetan energia hodi bele halo operasaun ba Rádiu Maubere, edal ho hanoin boot mai hosi Pe. Leoneto, energia ba batria bele karega hosi edal bisikleta nian. Nune’e tékniku nain rua ne’ebé permanente atu karega batria ho edal bisikleta mak kamarada Ernesto Faria no Abel Fernandes.

Iha rohan tinan 1978 bainhira baze apoiu rahun hosi atakes TNI nian, iha situasaun ne’ebé difikulta tebes ba operasaun Rádiu Maubere, nune’e Rádiu Maubere dala ida tan sés hosi públiku nia oin too ohin loron.

Molok Restaurasaun Independénsia iha 2002, Fretilin harii hikas Buletin Nakroma nune’e mós iha tinan 2005 harii tan Buletin foun ho naran lian Maubere, nu’udar orgaun informasaun Fretilin nian hodi habelar informasaun iha povu Maubere nia leet.

Iha tinan hira ba kotuk, iha esforsu balun atu harii emisaun Rádiu anua hetan difikuldades iha ordem finanseiru, maske nune’e komprimisiu atu harii orgaun informasaun makaas, tanba ne’e iha II Kongresu Nasionál aprova iha ninia estatutu artigu 94 kona-ba orgaun informasaun Fretilin nian.

Konsidera mós ba artigu 41 Konstituisaun RDTL lei numeru 3/2004, 14 Abril, kona-bá Partidus Polítikus artigu 16, alinea B, fo forsa mós ba Fretilin atu harii média hodi haklalen nafatin ba povu tomak kona-bá nia istória, 6anual no programa polítiku no informasaun seluk ne’ebé importante atu hametin paz, estabilidade no dezemvolvimentu ba Timor Leste.

Liu tiha II Kongresu Nasionál, Lideransa Fretilin fó orientasoens atu bele implementa desizaun ne’ebé foti, nune’e ho difikuldade oi-oin Sekretariadu nasionál iha tinan ida ba kotuk orgniza no prepara prosesu hodi harii hikas emisaun Rádiu Maubere.

Nune’e liu tiha tinan 37, bainhira emisaun ikus liu halo iha funu nia laran, Rádiu Maubere ho frekuénsia 99,9 MHZ fila hikaas mai ita nia let direitamenta hosi sede Nasionál Fretilin nian ne’ebé inagura iha loron 20 de Maio 2011.

Objektivu hosi Rádiu Maubere mak hanesan atu uza hodi transmite komunikasaun no fo sai informasaun iha nasionál no mós internasionál.

2.5  Kontribuisaun Rádiu nian ba Audiénsia.

 Dala barak liu Rádiu sempre fó nia kontribuisaun ne’ebé boot ba audiénsia sira, liu hosi oferese informasaun hirak ne’ebé mak audiénsia sira presiza.

Ita hotu haree Rádiu nia kontribuisaun ne’e boot tebetebes hanesan bainhira ita iha esforsu nia laran atu hetan ita nia independénsia, nia mós kontribui makaas hodi divulga informasaun ba audiénsia sira iha Nasionál no mós Internasionál. Sein informasaun ita nia Guerilleiros sira la bele halo buat ida, tanba sira presiza tebes informasaun atu bele suporta malu hodi monta estratezia funu nian. Tan ne’e mak Rádiu nia kontribuisaun nia audiénsia ne’e makaas tebetebes, sai parte ida oinsa atu dezenvolve informasun liu husi planu estratejia ba programa ne’ebé atu fahe no eduka husi media.

2.6.Funsaun Rádiu ba Audiénsia.

Rádiu nia funsaun prinsipál ba audiénsia mak hanesan, hodi hato’o informasaun, sai hanesan animadór, no hala’o funsaun hanesan eduka sosiedade sira.

Rádiu nia funsaun ida mós hanesan animadór tanba nia sempre oferese múzika ne’ebé mesak furak de’it, no oferese mós istória kómiku ba nia audiénsia sira.

Rádiu bele sai mós hanesan belun ba audiénsia sira tanba nia sempre hamaluk audiénsia sira nia aktividade lor-loron iha ne’ebé de’it laiha limitasaun ba fatin, nian funsaun hodi hato’o liu  husi:

-  atu eduka audiensia liu husi edukasaun sívika.

-  atu transforma informasaun liu husi konseitu programa sosial, poitika, ekonomia.

- iha balansu entre informasaun hirak ne’ebé fo sai.

KAPÍTULU III

METODOLOJIA PESKIZA

3.1 Metodolojia  peskiza

Metodolojia peskiza mak siénsia ida ne’ebé  uza atu bele hetan dadus ho objetivu ida.peskiza akontese wainhira problema nee’ebé mak ita fiar no la fiar. No sai hanesan baze ida hodi haforsa dadus neébé mak ami grpu ba peskiza iha instituisaun média refere.

Alende ne’e tuir Tartuce (2006) metodolojia peskiza atu trata kona-ba metodolojia siénsia.Nune’e metodolojia peskiza hanesan estudu sistematiku lójiku kona-ba sistemátiku kona-ba metódu siéntifiku. Tanba ne’e iha metódolojia peskiza ida ne’e bazeia ba koñesimentu ema nia liu husi relasaun entre sujeitu ho objeitu bele dehan relasaun entre ema ida ho ema seluk

3.2 Metódu peskiza

       Metodu peskiza mak metódu ida ne’ebé peskizadór uza hodi hakerek proposta ka monografia,tanba ne’e metódu peskiza hanesan matadalan ida ba peskizadór hodi hala’o peskiza iha area ne’ebé mak determina ona.

Alende ne’e tuir matenek na’i  Richardson (1989:29) metódu peskiza signifika atu hili prosedimentu sistemátiku atu hakerek no halo esplikasaun ba fenómeno ida,nune’e mós peskiza bele planeadu no komforme atu ezekuta normas iha metódu nia laran.

Relasiona ho ida ne’e iha métodu peskiza iha tipu rua ne’ebé baibain peskizador sira uza atu  halo peskiza mak  tipu kualitativa no kuantitativa.

Maibé iha tipu rua ne’e dalabarak peskizadór barak mak uza metódu peskiza tipu kuantitativu  tanba iha instrumentu no iha populasaun no sample hodi sura no sukat.  Dalabarak peskizadór sira la dún uza tipu kualitativu tanba iha nia la uza instrumentu atu sukat no la uza populasaun no sample maibé uza tékinku rekolla dadus.

3.3 Informandu xave

 Ami grupu uza tipu etnógrafia média, bainhira atu determina informandu xave na’in sira iha area etnógrafia média iimportante tebes tanba husi sira nia informasaun dadus kona-ba kultura komunidade uza média bele ke’e no halo deskrisaun via eskrita kona-ba etnógrafia média. Ami grupu uza tipu ida ne’e tanba relasiona o tema ne’bé mak iha ko’alia kona ba ekonomia dos média.

3.4. Entrevista

           Bazea ba dadus neébé ami grupo entrevista kona-ba ekonomia media no publisidade, neébé atu hatene kona-ba dadus husi fontes konfirmadu neébé hatoó ona sira nian programa no planu manejementu mai ami grupo, hodi sai hanesan dadus konfirmadu neébé ami grupo halaó, no  fontes neébé ami entrevista maka chefe Media Radiu Maubere, Sr. Ferdy Martins.

v Programa hosi Rádiu Maubere.

Rádiu Maubere iha nia programa hamutuk sanulu, kompostu hosi :

1.       Abertura : Foho Ramelau

2.      Nakroma Timor Leste.

3.      Notisia Semanal (Repete).

4.      Notisia Gravadu (Repete).

5.      Programa Vizita Ouvintes.

6.      Programa KLT.

7.      Fretilin iha Parlamentu Nasionál.

8.      Notisia Semanal Gravadu.

9.      Haksolok.

10.  Jingle EH Foho Ramelau.

Programa hirak ne’ebé mak mensiona iha leten mak sai hanesan programa diária ne’ebé mak transmite ou fó sai hosi estudiu Rádiu Maubere hodi fahe informasaun no mós diverte Públiku.

v Programa Publisidade iha Rádiu Maubere.

Maske hanesan Rádiu Partidu Polítiku nian, Rádiu Maubere mós hala’o nia programa públisidade, i programa publisidade ne’ebé maka agora dau-daun sira produz mak hanesan :

1.      Produz publisidade ba iha Base Company sira iha Kolmera.

2.      Publisidade ba Loza Three Santana.

3.      No sira mós halo publisidade ba iha NGO Merry Stopes,kona-ba Liña Foinsa’e no Defisientes.

Maske Rádiu Maubere laiha ema ne’ebé mak serbisu permanente iha área Sales, tanba problema boot ne’ebé mak sira hasoru mak hanesan menus rekursus umanus, ho situasaun hanesan ne’e maka ezizi membru hosi Rádiu Maubere sira atu serbisu hamutuk ka serbisu ekipa.

Prosesu atu produz programa publisidade ida iha Rádiu Maubere mak hanesan :

1.      Membru hosi Rádiu Maubere ba halo lobi ba kompañia ka emprezáriu sira.

2.      Halo aprezentasaun ba sira nia produtu katak hodi ho ezemplu publisidade balun ne’ebé mak sira produz ona, atu atrai ema sira ne’e hodi montan ou fó sai sira nia publisidade.

3.      Karik kompañia aseita ona sira asina kontratu, no entrega Quotation.

4.      Hafoin sira Transmite ba Públiku/ ouvintes.

Montante no folin husi publisidade Rádiu Maubere

·         Prepara presu ka quotasaun kada minutu $ 5.00  kada pakote produto.

·         Servisu hamutuk ho parseiru produtu  nain hodi lori ba media radiu maubere, husi programa.

·         Kada 60 minutu kompania fo 300$, ba hatun programa publisidade.

Finansiamentu ekonomia Rádiu Maubere nian

             Finasniamentu ne’ebé mak atu suporta média Rádiu Maubere mai husi partidu Fretilin no mós mai husi publisidade ho ida ne’e mak atu sustenta Rádiu Maubere hodi bele hala’o sira atividade.

aleinde ne’e finansiamentu ne’ebé  aprova ba iha setór departamentu minimu tanba kada

fulan partidu aprova orsamentu ba finansiamentu média nia ho montatnte ki’ik  ho ida ne’e mak ami grupu VII nia peskiza iha Rádiu Maubere kona-ba dadus ekonomia maibé( fontes la fó  informasaun detallu kona-ba numeru osan ka ekonomia atu suporta Média Rádiu Maubere tanba dadus ne’ sensetivu liu no fontes dehan deít montante kiík).

Osan ne’ebé mak média Rádiu Maubere hetan husi kampaña Fretilin nian no koompañia ne’ebé mak fó sira nia produtu hodi halo publisidade.

3.4  Fatin no tempu peskiza

Ami grupu nia fatin ne’ebé mak ami ba pskiza iha Rádiu Maubere no tempu iha loron 08/05/2018  iha edifisiu CCF Comoro.

KAPITULO IV

KONKLUZASAUN SUJESTAUN

4.1.Konkluzaun

Atu konklui deit katak  traballu ida ne’e sai hanesan peskiza ki’ikoan ida mai ami grupu VII hodi bele hatene kona-ba lala’ok Rádiu Maubere iha Timor Leste.

Aleinde ne’e mós atu konklui de’it katak Rádiu Maubere sai hanesan Média ida ne’ebé mak hamahan aan iha partidu nia okos tanba ninia ekonomia mai husi partidu.

Nune’e mós Rádiu Maubere ne’e rasik ninia ezistensia mai husi Partidu Fretilin duni tanba  iha nia história katak ema traballadór husiAustralianu mai entrega Rádiu ne’e ba Sekretáriu Jerál Partidu Fretilin Dr. Marí Alkatiri.

Tanba ne’e mak Rádiu Maubere seidauk bele sai média  ne’ébé  independente tanba ninia finanseiru ne’ebé mak atu sustenta média ne’e moris mai husi partidu Fretilin.

Relasiona ho ida ne’e mak Rádiu Maubere mak kanál ida ne’ebé atu bele transforma informasaun ba públiku hodi públiku bele hatene kona-ba situasaun iha rai laran no mós rai li’ur.

4.2. Sujestaun

Atu sujere de’it ba ita hotu katak traballu ida ne’e sai referensia ida mai ita atu bele haten kona-ba lala’ok peskiza iha Rádiu Maubere.

Atu sujere de’it katak Rádiu Maubere sai hanesan Média Ida ne’ebé mai  husi  partidu Fretilin rasik, nia finasiamentu mai husi partidu.

Aleinde ne’e atu sujere de’it ba parte hotu hotu  Rádiu Maubere mós média elektroniku ida ne’ebé hala’o nia knaar hanesan média sira seluk atu transamite informasaun ba públiku.

Relasiona ho ida ne’e mak atu sujere de’it ba parte kompetente katak Rádiu Maubere hanesan média partidu nian ne’ebé mak atu bele transmite programa Vizaun misaun partidu nia ba públiku.

Aleinde ne’e atu sujere de’it ba governu katak atu muda Rádiu Maubere sai média independente mak tenke iha kondsisaun ne’ebé di’ak no tenke iha finanseiru mai husi governu atu bele hala’o sira nia knaar halo di’ak.

REFERÉNSIA

GASTALDI,J. Petrelli elementos de economia politica.19-edição São-Paulo: saraiva

KEYNES, J. M. (1943). The International Clearing Union. In HARRIS, S.E. (1950, org.). The New Economics: Keynes Influence on Theory and Public Policies. New York: Alfred A. Knopf. Reproduzido em português em: SZMRECSÁNYI, T. (1978). John Maynard Keynes: economia. São Paulo: Ática.

DAHAL, P.  detrás de tu aparato de radio está el enemigo de clase (Movimiento de
radios obreras en la República de Weimar). In: Bassetes, L. (org.) de las ondas rojas
a las radios libres. Barcelona: editorial Gustavo Gili s.a., 1981